Հունիսի 2-ին Մոսկվայում տեղի կունենա Հայաստանի, Ադրբեջանի և Ռուսաստանի փոխվարչապետների հանդիպումը՝ տարածաշրջանային տրանսպորտային հաղորդակցությունների ապաշրջափակման հարցով, ասել է ՀՀ վարչապետ Նիկոլ Փաշինյանը։
«Վաղը տարածաշրջանային կոմունիկացիաների հետ կապված աշխատանքային խմբի հանդիպում է նախատեսված Մոսկվայում»,- նախօրեին Քիշնևում հայկական սփյուռքի հետ հանդիպմանն ասել էր Փաշինյանը։
Ավելի վաղ աշխատանքային խմբի համանախագահ, ՌԴ փոխվարչապետ Ալեքսեյ Օվերչուկը «Ինտերֆաքս»-ին ասել էր, որ կքննարկվեն տեխնիկական, «բայց շատ կարեւոր» մանրամասներ՝ կապված Ադրբեջանի և Հայաստանի միջև սահմանը հատելու կարգի հետ։
«Մենք խոսում ենք այն մասին, որ այս սահմանին լինելու են անձնագրային, մաքսային և բոլոր տեսակի հսկողություն, որոնք գոյություն ունեն միջազգային սահմաններին»,- ասել է Օվերչուկը։
Նա նշել է, որ կողմերն «ընդհուպ մոտեցել են մի իրավիճակի, երբ կարող են խոսել այն մասին, որ ի վիճակի են վերականգնել երկաթուղային հաղորդակցությունը Ադրբեջանի արևմտյան շրջանների և Նախիջևանի միջև»։
«Այդ դեպքում Հայաստանը ևս ապաշրջափակման և Նախիջևանի, Սյունիքի, Ադրբեջանի տարածքով Ռուսաստանի և ԵԱՏՄ մյուս երկրների, ինչպես նաև Իրանի հետ կապվելու հնարավորություն կստանա», - նշել է Օվերչուկը։
